www.ezkurdim.com

kampanyaykewa weşe, bi hergu ziwan bi hergu haway nê haqî mocneno ra.. ezî nameyê xu dana ser.

ÎTIRAZNAME

Sekreterîya Neteweyanê Yewbîyayeyan rê (NY)

Amadekerdoxanê belgeyanê heqê merdiman ê mîyannetewîyîyan rê, ê hêzan rê ke polîtîkaya cîhane de wayirê qisa û qudretî yî

Madeyê 2. yê destûra NY de ameyo vîrardene ke ganî heme neteweyî derheqê musteqbelê xo de wayirê qerarî bîyî.

Madeyê 3. nusîyayo ke bê ke ferqê cinsîyet, nîjad, ziwan û dînî bêro kerdene, ganî heme kesî wayîrê heqê merdiman û azadîyanê binkeyîyan bîyî.

Kurdistan reya verêne serra 1639 de bi peymana Qesrî Şîrin mabênê Împaratorîya Osmanî û Sefawîyan de ame pare kerdene, dim a 24 temmuze 1923 de zî bi peymana Lozane û bi riza û îmzaya welatanê Ewropa bi çar parçeyî.

Yeno zanayîş ke Rojhelato Mïyanên de nêzdî 35-40 mîlyon kurdî estê. Labelê estbîyayîşê kurdan nîno qebulkerdene û kurdî nînê naskerdene. Nameyê kurdan û Kurdistanî çin o. Gelek neteweyê ke nufusê înan nêreseno çend sey hezaran bîyê wayîrê dewlete, labelê estbîyayîşê kurdan bi qanûnanê kolonyalîstan ê nîjadperestan ê tirk, ereb û farisan çinbîyaye yeno hesibnayene.

Kurdî ne sey kêmnetewe (mînorîtet) ne zî Kurdistan sey welatêko kolonî yeno veynayene. Welatê mayo çend hezar serre ereb, tirk û farisan ser o hesibîyêno. Yanî ma çin ê. Statuyê welatê ma kolonîyêkî ra zî gelek apeyêr o, reng, ziwan û kulturê ma qedexekerde yo.

Wezîfeyê talan û îşxalkerdoxanê Kurdistanî, zilm, teda, înkar û asîmîlasyon ra teber çîyêna nîyo. Nê dewletan waşto ke Kurdistanê îşxalkerdeyî de çi çîyo ke têkildarê kurdan o orte ra wederê. Seba na amaca xo heme metodê zilm û tedayî ceribnayî.

Ma tarîxê xo de miqabilê zulmê dewletanê kolonyalîstan timûtim sere wedarito. Kurdistanê parebîyayî de adirê azadî û edeletî caran hewn a nêşîyo.

Çirê xoserbîyayîş û azadî kurdan ra teber heqê heme neteweyan o? Kosowa welatanê xoserîyan rê nimûneyêka newa ya. Ma zî heme heqanê neteweyanê azad û xoserîyan wazenê. Ma wazenê ke derheqê qederê xo de qisaya peyene ma bi xo vajê.

Dewletanê ereb, faris û tirkan ma nêxeliqnayî. Nê dewletan ra ver ma wayîrê welatê xo bîyî. Ma macîr nîyî.

Nika nameyê welat û şarê ma qedexe yo. Gama ke ma nameyê welatê xo vanê, nê dewletê kolonyalîstî ke merg û gonîya vêşêr çîyêna nêdanê ma, goreyê qanûnanê xoyê nîjadperestan cezaya zîndanî ma ro varnenê.

Ma kurdî êdî heq û edelet wazenê. Ma wazenê gedeyanê xo, bi ziwan û kulturê xo bi hewayêko azad pîl bikerê. Ma wazenê dew û qezayanê xo de bê ters biciwîyî. Almanya yahudîyan ra, Awustralya Aborjînan ra uzrê xo waşt.

Labelê kurdan ra kes uzir nêwazeno. Welatê kurdan hema zî çar parçe yo. Û her reya ke kurdan heq waşto ameyî kiştene.

Labelê wa kolonyalîstî naye baş bizane: Ma caran fek Kurdistanî ra veranêdanî!

Gelî dewlet û dezgeyan! Şima ê ke qederê cîhane ser o qerar danê! Madema ke dinya de nika nîzama ke şima ronaya vêrêno, ma wazenê şima ma kurdan rê zî statuyêkî peyda bikerê.

Ez sey yew kurdî, nîzamronayoxanê cîhane ra azadîya xo û welatê xo Kurdistanî apey wazenê. No heqê min o.


Bi rêz!
www.ezkurdim.com